ചിലത്

ചിലത്

ചിലതുണ്ട് പറയുവാൻ, ചിലതുണ്ട് കേൾക്കുവാൻ

ചിലതുണ്ട് ബാക്കി വയ്ക്കാനായ്

ചിലതുണ്ട് കണ്ണിന്റെ കാതിന്റെ പിന്നിൽ വ-

ന്നണിയത്തൊതുങ്ങിനിൽക്കാനായ്.

ചിലതെന്റെ നിദ്രയുടെ സംഗീതമായ് വന്നു

പുലരിയെ തോറ്റിയുണർത്താൻ

ചിലതെൻ പകലിന്റെയെരിതീയിൽ വേവുന്ന

ചുടു മരുസ്വപ്നങ്ങളായി

ചിലതീയിരുളിനെ ചന്ദ്രികച്ചാർ പൂശി

വെളിവായ് തൊടുത്തുയർത്താനായ്

ചിലത് വെണ്മണലിൽ സുനാമിപോൽ, പ്രാണനെ

പഴുതേയമുഴ്ത്തിയാഴ്ത്താനായ്

ചിലതു,ണ്ടറുതിയിലാഴുന്ന ജീവന്ന്

പുതു ചേതനശ്വാസമേകാൻ

ചിലതു,ണ്ടപരന്റെ പരുഷമാം വാക്കിനെ-

യിനിയ സംഗീതമായ് മാറ്റാൻ

ചിലതുണ്ട് ചിതലിച്ച ലോകത്തെ വാക്കിനാ,-

ലൊരു നോക്കിനാൽ പുതുക്കാനായ്

ചിലതു,ണ്ടിനിയും വരാത്ത നാളേ,യ്ക്കതിൻ

പുതുമന്ത്രമായ് ചെവിയിലോതാൻ.

ചിലതുണ്ട് പറയുവാൻ, ചിലതുണ്ട് കേൾക്കുവാൻ,

ചിലതുണ്ട് ബാക്കിയായ് നിത്യം!                                         *